Австралия ҳукумати Голливуд актёри Жонни Депп ўзининг терьер зотидаги иккита кучукчасини мамлакатга рухсатсиз олиб киргани учун 10 йилга қамалиши ёки 340 минг доллар жарима тўлаши мумкинлигини тасдиқлади, деб хабар қилади «Газета.ru».
Деппнинг учувчиси ҳам бу ишда қатнашганлиги учун 2 йилга қамалиши мумкин.
Бу ҳақда Канберрада ўтказилган Австралия сенатининг қишлоқ хўжалиги, минтақавий ва транспорт ишлари бўйича қўмиталариининг йиғилишида маълум қилинди. Йиғилганлар қаршисида Қишлоқ хўжалиги вазирлиги ходимлари чиқиш қилди. Барча қўмита аъзолари Бу ва Пистоль лақабли йоркшир терьерларини ким мамлакатга киритганига ойдинлик киритишни истади.
Бу ишни Австралия Қишлоқ хўжалиги вазирлиги суриштиришда давом этади. Депп, унинг ҳамроҳлари ва экипаж аъзолари итларни декларация қилмаган, деб ҳисобланмоқда. Австралия божхонаси вакиллари эса Бу ва Пистолни йўловчиларни тушуриш жараёнида кўрмаган.
«Кариб денгизи қароқчилари—5» фильмининг суратга олиш ишлари Австралияда ўтказилмоқда. Фильм бош қаҳрамони Жонни Депп шу сабабли мамлакатга ташриф буюрганди.
Австралия Қишлоқ хўжалиги вазири Барнаби Жойс актёрга талаб қўйди: ё 50 соат ичида у кучукларни мамлакатдан олиб чиқиб кетади ёки итлар заҳарлаб ўлдирилади. Депп олдин кучукларни АҚШга жўнатди, 25 май куни эса ўзи ҳам Австралиядан чиқиб кетди.
Изоҳ (0)