Ўзбекистон Марокашдаги дзюдо турнирида умумжамоа ҳисобида 21-ўринни эгаллади

Марокашнинг Работ шаҳрида дзюдо бўйича «Masters» сериясига кирувчи нуфузли турнир якунланди, деб хабар қилади «Olamsport.com».

Мусобақада иштирок этган Ўзбекистон терма жамоаси аъзолари битта бронза медали билан чекланди. Тўлиқ таркиб қатнашмаган «Masters»да 60 килограмм вазн тоифасида Ўзбекистон шарафини ҳимоя қилган Шарофиддин Лутфуллаев бронза медалига сазовор бўлди.

Эътиборга молик жиҳати шундаки, Лутфуллаев бронза медали учун кечган беллашувда яна бир ўзбекистонлик спортчи Диёрбек Ўрозбоевни мағлубиятга учратди. Диёрбек 5-ўринни эгаллади. 66 килограмм вазн тоифасида иштирок этган икки карра Олимпия ўйинларининг бронза медаль совриндори Ришод Собиров илк беллашувидаёқ россиялик Михаил Пуляевга имкониятни бой берганди.

Мусобақанинг сўнгги куни 100 кг вазн тоифасида Рамзиддин Саидов гиламга чиқди. Афсуски, у ҳам илк даврада голландиялик Хенк Гролга ютқазиб қўйди. 73, 81, 90 кг вазн тоифаларида ва 100 килограмдан ортиқ вазн тоифасида ўзбекистонликлардан ҳеч ким иштирок этмади.

Якунда Ўзбекистон терма жамоаси умумжамоа ҳисобида 51 давлат орасида 21-ўринни эгаллади. Учта олтин, шунча кумуш, 6 та бронза медалини қўлга киритган дзюдо ватани Япония терма жамоаси биринчи ўринни банд этди. Икки нафардан чемпионга эга бўлган Россия ва Мўғулистон терма жамоалари кучли учликка якун ясади.