Marokashning Rabot shahrida dzyudo bo‘yicha “Masters” seriyasiga kiruvchi nufuzli turnir yakunlandi, deb xabar qiladi “Olamsport.com”.
Musobaqada ishtirok etgan O‘zbekiston terma jamoasi a’zolari bitta bronza medali bilan cheklandi. To‘liq tarkib qatnashmagan “Masters”da 60 kilogramm vazn toifasida O‘zbekiston sharafini himoya qilgan Sharofiddin Lutfullayev bronza medaliga sazovor bo‘ldi.
E’tiborga molik jihati shundaki, Lutfullayev bronza medali uchun kechgan bellashuvda yana bir o‘zbekistonlik sportchi Diyorbek O‘rozboyevni mag‘lubiyatga uchratdi. Diyorbek 5-o‘rinni egalladi. 66 kilogramm vazn toifasida ishtirok etgan ikki karra Olimpiya o‘yinlarining bronza medal sovrindori Rishod Sobirov ilk bellashuvidayoq rossiyalik Mixail Pulyayevga imkoniyatni boy bergandi.
Musobaqaning so‘nggi kuni 100 kg vazn toifasida Ramziddin Saidov gilamga chiqdi. Afsuski, u ham ilk davrada gollandiyalik Xenk Grolga yutqazib qo‘ydi. 73, 81, 90 kg vazn toifalarida va 100 kilogramdan ortiq vazn toifasida o‘zbekistonliklardan hech kim ishtirok etmadi.
Yakunda O‘zbekiston terma jamoasi umumjamoa hisobida 51 davlat orasida 21-o‘rinni egalladi. Uchta oltin, shuncha kumush, 6 ta bronza medalini qo‘lga kiritgan dzyudo vatani Yaponiya terma jamoasi birinchi o‘rinni band etdi. Ikki nafardan chempionga ega bo‘lgan Rossiya va Mo‘g‘uliston terma jamoalari kuchli uchlikka yakun yasadi.
Izoh (0)