Хотин-қизлар қўмитаси баъзи хонандаларимизнинг кийими ва клипларини «нишон»га олди

Ўзбекистон Хотин-қизлар қўмитаси Ёшлар ижод саройида «Маънавиятимизни асраб қолайлик!» деб номланган тадбир ўтказди, деб хабар қилади «Uz24.uz».

Хабарларга кўра, мутасадди ташкилотлар, санъаткорлар, жамоатчилик фаоллари иштирок этган тадбирда ўзбек хонандаларининг кийиниш, ўзини тутиш маданияти, айрим клипларнинг ёшлар маънавиятига салбий таъсири ва бошқалар ҳақида сўз юритилган.

Муҳокамалар чоғида хонанда Лола ҳамкасби Райҳоннинг концерт дастурида кийган, дизайнер Зулфия Султон томонидан яратилган либос бизнинг менталитетимизга умуман тўғри келмаслиги қатъий айтиб ўтилган. Маълум бўлишича, дизайнер Зулфия Султон либос ҳақидаги эътирозларга «Бу саҳна либоси, агар ҳамманинг фикри инобатга олинса, санъатимиз ривожланмай қолади-ку», — деб жавоб берган.

Шунингдек, Лола ва Райҳоннинг «Кўникмадим» қўшиғига суратга олинган клип ҳам қаттиқ танқид остига олинган. «Ҳеч қандай маъно-мазмун касб этмайди деб топилган мазкур клип, ёшлар тафаккурида аксинча салбий фикрлар, ўйлар пайдо бўлишига сабаб бўлаётгани таъкидлаб ўтилди», дейилади манбада.

Мониторда «Божалар» гуруҳи, Нилуфар, Каниза, Ягона, Жасур Ғоипов, Тамила ва яна бир қанча ижодкорларнинг клиплари ҳам бирма-бир намойиш қилиниб, савияси йўқ клиплар деб айтиб ўтилган.

Клиплар борасида сўз кетар экан, телевидение ҳамда «Ўзбекнаво» эстрада бирлашмаси клиплар юзасидан ҳеч қандай жавобгарлик уларнинг зиммасида эмаслигини айтиб ўтган.

Хонандалар фақатгина тўйлар учун ижод қилмасдан, маънавиятимизни асраб қолишлари учун ҳам ижод қилишлари таъкидлаб ўтилган ва агарда юқоридаги ҳолатлар давом этаверса, кейинги тадбирларда ижодкорлар бирма-бир саҳнага чиқарилиб, уларнинг номуносиб ишлари очиқ-ойдин муҳокама қилиниши айтилган.