Британияда «иблис асирига айланган» тиббий ходим ўз беморларини ўлдиришда айбдор деб топилди

Буюк Британияда тиббиёт ходими 33 та айблов банди бўйича айбдор деб топилди. Шу жумладан у икки кишини ўлдириш ва 20 кишини заҳарлашда айбланмоқда, деб хабар қилади «Nur.kz».

Жиноятлар Англиянинг «Стипинг Ҳилл» шифохонасида 2011 йил июль ойида содир этилган.

Келиб чиқиши филиппинлик бўлган 49 ёшли Британия фуқароси Викторино Чуа Филиппиндаги шифохонада ҳам ишлаган ва ўғирлик билан қўлга тушган экан.

Чуанинг уйидан топилган ёзувда қуйидагилар қайд этилганди: «Мен яхши одамман, аммо ичимда иблис бор… Мен ёвузман, лекин шу билан бирга фариштаман. Тиббиёт ходимининг қайғули тавбаси». Ҳуқуқ-тартибот идоралари Чуанинг психопатик ҳаракатларга мойиллигини таъкидлади.

Тиббий ходим ўзи ғамхўрлик қилган беморларни қасддан заҳарлаган ва ўлдирган. Айбланувчи беморларга бошқа дориларни берган ва дорилар миқдорини ошириш учун тиббий карталарни алмаштирган.

Чуанинг иши бўйича суд ҳукми 19 май куни эълон қилинади.