БМТ бош котиби Пан Ги Мун Миср судининг мамлакат собиқ президенти Муҳаммад Мурсий ва «Мусулмон биродарлар» етакчиларини қатл этиш тўғрисидаги ҳукмини ташвиш билан қабул қилди ва жаҳон ташкилоти олий жазога кескин қарши чиқишини эслатди, деб ёзади ТАСС.
Бош котиб расмий вакили ўринбосари Фархон Хак журналистларга маълум қилишича, Пан Ги Мун «апелляция судида ҳукмга қарши чиқиш учун имкон борлигини тушунади». «У процессни диққат билан кузатиб боради», — дея таъкидлади Хак.
Эслатиб ўтамиз, 16 май, шанба куни эрталаб Миср собиқ президенти Муҳаммад Мурсий ва «Мусулмон биродарлар» ташкилотининг 105 нафар тарафдори ўлим жазосига ҳукм қилинди. Ҳукм қуйидаги жиноят ишлари якуни бўйича чиқарилган: қамоқхонадан оммавий қочиш, давлатга хиёнат ва ўзга давлат фойдасига жосуслик қилиш. Давлатга хиёнат ишида Мурсийнинг исми йўқ эди. Миср собиқ президенти 2011 йили юз берган қамоқхонадан оммавий қочиш иши бўйича ўлимга ҳукм қилинган. Энди ушбу ҳукмни Миср олий муфтийси тасдиқлаб бериши керак.
Изоҳ (0)