КХДР етакчиси Ким Чен Ин Корея Меҳнат партиясининг 10 октябрда нишонланадиган 70 йиллиги муносабати билан янги сунъий йўлдошни коинотга учиришга буйруқ берди, деб хабар қилади «РИА Новости».
Маълумотларга қараганда, Ким Чен Ин бу буйруқни Давлат Космик тадқиқотлар бошқармасига 2015 йил бошида берган.
Сунъий йўлдошларни учириш Пхеньян томонидан тинчлик мақсадида эканлиги билан изоҳланаётганига қарамай, КХДР улардан ядро каллакларига эга қитъалараро баллистик ракета сифатида фойдаланиши мумкинлиги хабар қилинмоқда. Шимолий Корея охирги марта 2012 йилда «Инха—3» ташувчи ракетасида сунъий йўлдошни самога учирганди.
Япониялик мутахассислар фикрига кўра, КХДРнинг баллистик ракеталари 10 минг километр масофани босиб ўтиб, АҚШнинг ғарбий қирғоқларигача етиб бориши мумкин.
Жанубий Кореянинг Рёнхап агентлиги хабарига кўра, 2013 йил охиридан бери Шимолий Корея Тончханни қишлоғида учиш майдони қурмоқда. Қурилиш ишлари якунига етганда бу ердан узунлиги 40—43 метр бўлган ракеталарни учириш мумкин бўлади.
Изоҳ (0)