Samsung компанияси Японияда сотиладиган Galaxy S6 ва Galaxy S6 Edge флагман смартфонларидан Samsung’ни ёдга солиши мумкин бўлган барча белгиларни олиб ташлаганига қарамай, қурилмаларнинг Кунчиқар юртдаги савдоларида ўсиш кузатилмади. Бу ҳақда THG.ru хабар бермоқда.
Савдоларнинг биринчи ҳафтасида ҳам Samsung Galaxy S6 Edge 10-ўриндан юқорига кўтарила олмаган, иккинчи ҳафтада эса 16-ўринга тушиб кетган. Samsung Galaxy S6’нинг аҳволи эса бундан ҳам ёмонроқ – қурилма савдоларнинг биринчи ҳафтасида 17-, иккинчи ҳафтада эса 30-ўринни эгаллади.
Эътиборли томони, жаҳоннинг кўплаб бошқа мамлакатларида ушбу вазиятнинг мутлақо акси кузатилмоқда ва кўплаб таҳлилчилар томонидан Samsung Galaxy S6 ва Samsung Galaxy S6 Edge жаҳондаги энг яхши смартфон деб баҳоланмоқда.
Баъзи мутахассислар Samsung’нинг Япониядаги муваффақиятсизлигини Макартур синдроми билан изоҳлашмоқда – унга кўра, япониялик истеъмолчилар Ғарб маҳсулотларини Осиёда ишлаб чиқарилган товарларга нисбатан кўпроқ қадрлашади. Японияда iPhone смартфонлари жуда ҳам машҳурлигини ҳам шу билан изоҳлаш мумкин.
Изоҳ (0)