NASA’нинг инсон ёки бошқа мавжудот турган жойни юрак уришига кўра топа оладиган инновацион технологияси Непалдаги ҳақиқий шароитларда синаб кўрилди. News.Liga.net’нинг ёдга солишича, Непал 25 апрель куни содир бўлган вайронкор зилзиладан жиддий зарар кўрганди.
Хабар беришларича, АҚШ Ички хавфсизлик вазирлиги томонидан NASA мутахассислари билан ҳамкорликда ишлаб чиқилган мослама шошилинч равишда Непалга етказилган ва у вайроналар остида қолиб кетган тўрт кишининг қутқарилишига ёрдам берган.
Ишлаб чиқувчиларнинг сўзларига кўра, мослама 2013 йилда тайёрланганди, бироқ уни ҳақиқий дала шароитида энди синаб кўришди. Ускуна вайроналар остида 10 метргача, бетон остида 7 метргача ва очиқ маконда 30 метргача чуқурликдаги инсон юраги уришини микротўлқинли радар орқали аниқлайди.
Технологияни такомиллаштиришнинг кейинги босқичи сифатида детектор қурилмани роботлаштирилган тизимлар билан бириктиришдан иборат. Яъни, бунда робот мустақил равишда вайроналар остидаги одамни топади ва уни қутқариш йўлларини аниқлайди.
Изоҳ (0)