Непалдаги ер силкинишидан сўнг изсиз йўқолган Европа иттифоқи фуқаролари сони тахминан минг кишини ташкил қилади, деб хабар беради «Лига.Новости».
ЕИнинг Непалдаги вакили Ренсже Тееринканинг сўзларига кўра, йўқолганларнинг катта қисми Эверест чўққисига йўл олган ёки тоғли туманлардан бири Лангтангда бўлиши мумкин.
Ер силкиниши тоғ чўққиларини забт этиш мавсумининг авжига тўғри келди. Ҳозиргача Европа иттифоқининг 12 фуқароси ҳаётдан кўз юмгани маълум. Уларнинг аксарияти зилзиладан сўнг юзага келган қор кўчкисида ҳалок бўлган.
Бундан ташқари, ўз мамлакати элчихонасини огоҳлантирмасдан Непалга келувчи «ёввойи» сайёҳлар ҳам кўпчиликни ташкил қилади. Бу ҳам ўз навбатида уларни қидириш ишларини мураккаблаштиради.
Ҳозирда минглаб непалликларнинг ҳам тақдири номаълумлигича қолмоқда. Непал ҳукумати ҳисобига кўра, зилзила натижасида ҳалок бўлганлар сони 10 мингга етиши мумкин.
Эслатиб ўтамиз, Непалда 25 апрель куни 7,9 магнитудали ер силкиниши содир бўлди. Эпицентри мамлакат пойтахтидан 82 километр узоқликда бўлган зилзиладан кейин бир нечта афтершоклар кузатилди. Такрорий зилзилаларнинг энг кучлиси 6,7 магнитуда бўлди.
Аввалроқ Фавқулодда вазиятлар бўйича миллий марказ зилзиланинг 138 мингдан ортиқ уй ва 10 мингдан зиёд ҳукумат муассасалари биноларини бутунлай вайрон қилганини хабар берган эди. Яна 120 мингта уй ва 13 мингта ҳукумат ташкилотларига турли даражада зарар етган. Зилзиладан кейинги қайта тиклаш ишлари учун мамлакатга 2 миллиард доллар зарур бўлади.
Изоҳ (0)