Саудия Арабистони ҳарбий-ҳаво кучлари ва унинг «Араб коалицияси» бўйича иттифоқчилари пайшанба куни тонгда Яман шимолидаги Хус шаҳрига авиазарбалар берди. Бу ҳақда ТАСС хабар бермоқда.
Al-Manar телеканали маълумотларига кўра, ҳужум оқибатида 33 нафар тинч аҳоли вакили ҳалок бўлган, яна 30 нафардан ортиғи турли даражада тан жароҳатлари олган. Хус Яманнинг Амран вилоятида жойлашган бўлиб, ушбу вилоят қўшни Саъда ва Сана каби коалиция томонидан фаол бомбардимон қилинмоқда.
Чоршанба куни Саудия самолётлари Саъдадаги давлат муассасаларига ҳужум қилганди. Шаҳарнинг кўҳна қисми – Ал-Ҳафжий бозор майдони ва Хафсин туманининг бомбардимон қилиниши натижасида 17 нафар тинч аҳоли ҳалок бўлган, 49 нафари яраланганди.
SABA ахборот агентлиги хабарига кўра, шаҳарда иккита банк, почта, кутубхона бинолари вайрон бўлган. Коалиция авиацияси Саъда ва унга қўшни Шода ва Мажаздаги олтита АЁҚШни йўқ қилган. Шаҳар атрофида эса Жебел-ал-Аҳмар тоғ ён-бағирларидаги исёнчи-хусийларнинг қароргоҳларига рейд уюштирилган.
Саъда шиа-зайдчиларнинг диний маркази ҳисобланади. Асосан мамлакат шимолида оммавий бўлган ушбу диний йўналишга Яманнинг 48 фоиз аҳолиси мансубдир. Саъда пойтахт Санадаги ҳокимиятни эгаллаб олган исёнчи-хусийларнинг «Ансоруллоҳ» ҳаракати таянчи ҳамдир. Хусийларнинг давлат тўнтаришини Яманнинг собиқ президенти Али Абдулла Солиҳ (у ҳам зайдчи)га садоқатини сақлаб қолган армиянинг аксарият вакиллари қўллаб-қувватлади.
Олий инқилобий қўмита чақирувига мувофиқ, 16 апрель куни Яман шаҳарларида урушга қарши намойишлар бўлиб ўтади. Намойиш иштирокчилари сешанба куни БМТ Хавфсизлик кенгаши томонидан қабул қилинган, шиа исёнчиларга қурол ва ҳарбий ускуналарни етказиб беришни тақиқловчи резолюцияни қоралаб чиқишади. Ҳужжат исёнчи-хусийларнинг «бирёқлама ҳаракати»ни қоралаб, улардан зўравонликни тўхтатиш, Сана ва бошқа ҳудудлардан ўз жанговар бўлинмаларини олиб чиқиш, шунингдек, ҳукумат қўшинларидан тортиб олинган қуролларни топширишни талаб қилади.
«Ансоруллоҳ»нинг сиёсий бюроси аъзоси Муҳаммад ал-Бахитий Al-Mayadin телеканалига маълум қилишича, БМТ ХК резолюцияси эълон қилинганидан сўнг, «Яманга қарши тажовузкор ҳаракатлар сезиларли кучайган». Шунга қарамай, унинг қайд этишича, Яман халқининг «инқилобни давом эттириш ва Ал-Қоида» террорчилари ва корруционерларга қарши кураш олиб бориш учун қонуний ҳақи бор».
«Биз ҳали ҳам Саудия Арабистони томонидан бошланган урушга жавоб берганимизча йўқ, чунки масала сиёсий йўл билан ҳал этилишига умид қилиб турибмиз», - деди ал-Бахитий. У хусийлар номидан гапираркан, «Яман ичида мулоқот ўрнатишга тайёрлиги»ни билдирди.
Изоҳ (0)