Россия Марказий Осиёдаги ядро қуролидан холи ҳудуд ҳақидаги шартнома протоколини 27 апрель куни Нью-Йоркда ядро қуролини тарқатмаслик тўғрисидаги шартнома бўйича бўлиб ўтадиган конференция бошлангунича ратификация қилиш сиёсий жиҳатдан тўғри деб ҳисоблайди. Бу ҳақда Россия ташқи ишлар вазири ўринбосари Сергей Рябков айтиб ўтди, деб ёзади ТАСС.
«Ҳужжат якуний равишда халқаро ҳуқуқий жиҳатдан расмийлашиши учун уни барча ядро давлатлари ратификация қилиши керак, — дея аниқлик киритди дипломат. — Ратификация жараёни бизда илғор бормоқда. Буюк Британия ва Франция протоколни ратификация қилиб бўлди».
Эслатиб ўтамиз, 10 апрель куни Россия Давлат думаси Марказий Осиёдаги ядро қуролидан холи ҳудуд ҳақидаги шартнома протоколини қўшимча шартлар билан ратификация қилди. Уларга кўра, Россия ўзига ёки унинг қўшинларига, шунингдек унинг иттифоқдошларига ҳужум уюштирилса, ўзини протоколда назарда тутилган ҳолатлар билан чекланган деб ҳисоблаб ўтирмайди.
2014 йил 6 майда Нью-Йоркда имзоланган ҳужжат ядро давлатлари — Буюк Британия, Хитой, Россия, АҚШ, Францияни Шартномага аъзо мамлакатларга қарши ядро қуролини қўлламаслик ва уни қўллаш ҳақида таҳдид қилмасликни юклайди.
Изоҳ (0)