АҚШ 2030 йил арафасида ҳам ЯИМ ҳажми катталиги бўйича жаҳонда етакчи бўлиб қолади

АҚШ 2030 йил арафасида ҳам жаҳоннинг энг йирик иқтисодиёти мақомини сақлаб қолади, бироқ жаҳон ялпи ички маҳсулоти (ЯИМ)даги АҚШнинг улуши 2015 йилдаги 23 фоиздан 20 фоизгача қисқаради. Бу ҳақда Bloomberg хабар бермоқда.

Хабар беришларича, АҚШ Қишлоқ хўжалиги вазирлиги жаҳоннинг иқтисодий жиҳатдан энг ривожланган 20 мамлакати ЯИМлари ўсишининг 2030 йилгача бўлган макроиқтисодий прогнозини тайёрлаган.

Ушбу прогнозга кўра, АҚШ етакчиликни сақлаб қолади, 2030 йилга бориб мамлакат ЯИМ ҳажми 24,8 триллион долларга етади.

Иккинчи ўринни эса 22,2 триллион долларлик ЯИМ билан Хитой эгаллайди.

Прогнозга кўра, учинчи ўринни 6,6 триллион доллар ҳажмидаги ЯИМ билан Ҳиндистон эгаллайди. Халқаро валюта жамғармасининг қайд этишича, кейинги 15 йил давомида жаҳондаги энг қудратли ишлаб чиқариш қувватлари айнан Ҳиндистонда бўлади.

Россия 2030 йилга бориб, Канада ва Бразилияни олдинга ўтказиб юборгани ҳолда, 2,4 триллион долларлик ЯИМ билан 10-ўринни эгаллайди.