АҚШ Эрон 2 апрель куни Лозаннада эришилган келишувга риоя қилса, унга киритилган санкциялар бекор қилинишига кафолат берди, деб ёзади «Европейская Правда» нашри.
Бу ҳақда АҚШ президенти Барак Обама Вашингтонда пайшанба куни тарқатилган халққа мурожаатида айтиб ўтди.
«Ушбу битим ишончга асосланмайди, у назорат пойдеворига қурилади», — дея таъкидлади Обама ва Эронда ҳар қандай давлатдагидан кўра кўпроқ текширувлар олиб борилишини қўшимча қилди. Унинг айтишича, Ғарбнинг бунга жавоби санкцияларни бекор қилиш бўлади.
Санкцияларни кучсизлантириш аста-секинлик билан амалга ошади ва Эроннинг битимга риоя қилишига боғлиқ бўлади. Шу билан бирга, Обама сўзларига кўра, Эронда инсон ҳуқуқлари бузилиши ва баллистик ракета ишлаб чиқилишига алоқадор санкциялар тўлиқ кучда қолади.
Эслатиб ўтамиз, 2 апрель куни Эрон ва халқаро воситачилар «олтилиги» Эрон ядро дастури бўйича сиёсий келишувга эришди. Битимни тайёрлаш жараёни 30 июнгача якунланади. АҚШ Давлат департаменти баёнотида айтилишича, Эрон ядро дастури устидан назорат турли йўналишлар бўйича 10 йилдан 25 йилгача давом этади.
Изоҳ (0)