Эрон ва халқаро воситачилар «олтилиги» (АҚШ, Россия, Буюк Британия, Франция, Хитой ва Германия) Эрон ядро дастури бўйича сиёсий келишувга эришди. Бу ҳақда 2 апрель, пайшанба куни Лозаннадаги матбуот анжуманида Евроиттифоқнинг ташқи ишлар ва хавфсизлик сиёсати бўйича вакили Федерика Могерини маълум қилди, деб ёзади «РИА Новости».
Унинг айтишича, битимни тайёрлаш жараёни 30 июнгача якунланиши керак. Шу билан бирга, у Эроннинг уранни бойитиш бўйича имконияти чекланишини, захиралари эса мамлакатдан чиқариб кетилишини таъкидлади.
Буюк Британия ТИВ раҳбари Филипп Ҳаммонд битим Теҳроннинг ядро дастури тинчлик хусусиятига эга бўлиши кафолатини таъминлашини айтди. Шунингдек, унинг сўзларига кўра, битимларга риоя қилинса, Эронга қарши санкциялар анча кучсизлантирилади.
Эрон ТИВ раҳбари Жавaд Зариф битим тузилгунига қадар Теҳроннинг «олтилик» олдида ҳеч қандай мажбуриятлари бўлмаслигини қайд этди.
АҚШ Давлат департаменти баёнотида айтилишича, Эрон ядро дастури устидан назорат турли йўналишлар бўйича 10 йилдан 25 йилгача давом этади.
Изоҳ (0)