Охота денгизининг «Узоқ Шарқ» траулери чўкиб кетган акваториясида қидирув-қутқарув операцияси давом этмоқда, деб ёзади Россия фавқулодда вазиятлар вазирлиги матбуот хизмати.
Балиқчилик кемалари томонидан 63 киши қутқарилган, уларнинг 7 нафари оғир аҳволда. Шунингдек сувдан 54 кишининг жасади чиқариб олинди.
Вазирлик траулер йўловчи ва экипажи тўлиқ рўйхатини эълон қилди. Ундан асли бухоролик Абдуллаев Фарҳод Саъдуллаевич ҳам ўрин олди. Унинг лавозими биринчи синф матроси деб кўрсатилган.
Эслатиб ўтамиз, аввалроқ Охота денгизидаги «Узоқ Шарқ» траулери (балиқ овлайдиган денгиз кемаси) ҳалокатга учраган жойда қидирув-қутқарув операциясига жалб қилинганлар сони деярли икки марта —1,4 минг кишигача кўпайтирилгани хабар берилган эди.
«Узоқ Шарқ» катта автоном траулери 2 апрель, пайшанбага ўтар кечаси Охота денгизи акваториясида Магадандан 300 км масофада чўкиб кетди. Кема бортида, дастлабки маълумотларга кўра, 78 нафар россиялик ва 54 нафар хорижлик бўлган.
Изоҳ (0)