Яман ташқи ишлар вазири Риёд Ёсин Яманда яқин кунлар ичида араб давлатлари томонидан ҳарбий операция ўтказилиши учун зарурат борлиги ҳақида айтиб ўтди, деб ёзади «РБК».
Мисрнинг Шарм-ал-Шайх шаҳрида бўлиб ўтган Араб давлатлари лигаси саммитида Ёсин шиаларнинг хусийлар ташкилотига қарши курашиш учун ер усти қўшинлари керак бўлишини маълум қилди.
Бироқ Саудия Арабистони Яманга ер усти қўшинларини юбориш ҳақида қарор қабул қилганича йўқ. Саудиянинг АҚШдаги элчиси сўзларига кўра, «ҳозирча фақат ҳаво операцияси ўтказилади».
Эслатиб ўтамиз, 25 март куни Яман президенти Абду Раббо Мансур Ҳодий Адан шаҳридаги бошпанасидан номаълум йўналишга қараб қочган, бунга шаҳарга хусийлар яқинлашаётгани сабаб бўлган эди. 27 март куни эса Ҳодий Саудия Арабистони пойтахти Ар-Риёд шаҳрига етиб келди.
26 март, пайшанбага ўтар кечаси Саудия Арабистони шиа исёнчиларига қарши операция бошланганини эълон қилди, унда яна тўққиз давлат қатнашмоқда. Ар-Риёд хусийларга қарши 100 та қирувчи самолёт ва 150 мингта аскар жўнатди.
Изоҳ (0)