АҚШ Яман президенти Абду Раббо Мансур Ҳодий билан ҳам, исёнчи шиалар билан ҳам алоқа қилгани йўқ. Бу ҳақда АҚШ давлат департаменти расмий вакили Жефф Ратке айтиб ўтди, деб ёзади ТАСС.
«Қўшма Штатлар Яман раҳбари ва хусийлар вакиллари билан алоқада бўлгани йўқ. Ушбу араб давлатидаги ҳаракатларимизнинг барчаси Саудия Арабистони билан ҳамкорликда амалга оширилмоқда», — дея таъкидлади Ратке.
Эслатиб ўтамиз, 25 март куни Яман президенти Абду Раббо Мансур Ҳодий Адан шаҳридаги бошпанасидан номаълум йўналишга қараб қочган, бунга шаҳарга хусийлар яқинлашаётгани сабаб бўлган эди. 27 март куни эса Ҳодий Саудия Арабистони пойтахти Ар-Риёд шаҳрига етиб келди.
26 март, пайшанбага ўтар кечаси Саудия Арабистони шиа исёнчиларига қарши операция бошланганини эълон қилди, унда яна тўққиз давлат қатнашмоқда. Ар-Риёд хусийларга қарши 100 та қирувчи самолёт ва 150 мингта аскар жўнатди.