Yaman tashqi ishlar vaziri Riyod Yosin Yamanda yaqin kunlar ichida arab davlatlari tomonidan harbiy operatsiya o‘tkazilishi uchun zarurat borligi haqida aytib o‘tdi, deb yozadi “RBK”.
Misrning Sharm-al-Shayx shahrida bo‘lib o‘tgan Arab davlatlari ligasi sammitida Yosin shialarning xusiylar tashkilotiga qarshi kurashish uchun yer usti qo‘shinlari kerak bo‘lishini ma’lum qildi.
Biroq Saudiya Arabistoni Yamanga yer usti qo‘shinlarini yuborish haqida qaror qabul qilganicha yo‘q. Saudiyaning AQShdagi elchisi so‘zlariga ko‘ra, “hozircha faqat havo operatsiyasi o‘tkaziladi”.
Eslatib o‘tamiz, 25-mart kuni Yaman prezidenti Abdu Rabbo Mansur Hodiy Adan shahridagi boshpanasidan noma’lum yo‘nalishga qarab qochgan, bunga shaharga xusiylar yaqinlashayotgani sabab bo‘lgan edi. 27-mart kuni esa Hodiy Saudiya Arabistoni poytaxti Ar-Riyod shahriga yetib keldi.
26-mart, payshanbaga o‘tar kechasi Saudiya Arabistoni shia isyonchilariga qarshi operatsiya boshlanganini e’lon qildi, unda yana to‘qqiz davlat qatnashmoqda. Ar-Riyod xusiylarga qarshi 100 ta qiruvchi samolyot va 150 mingta askar jo‘natdi.
Izoh (0)