Ўзбекистонда миллий бош кийимлар тўғрисида китоб нашрдан чиқди

«Шарқ» нашриёт уйи томонидан «XIX—ХХ асрларда ўзбекларнинг миллий бош кийимлари» альбом китоби чоп этилди, дея хабар бермоқда «12news.uz». Унга тарих фанлари доктори, профессор Нафиса Содиқова ва Камолиддин Беҳзод номидаги миллий рассомлик ва дизайн институти битирувчиси Юлдуз Ғайбуллаева муаллифлик қилди.

Китобда музей фондларидаги ноёб бош кийимлар намуналари намойиш этилган. Улар минтақалар, аҳолининг ижтимоий келиб чиқиши, ёш белгилари ва мақсадларига кўра турларга бўлинган. Аёллар бош кийимлари — турли ўлчамдаги ва турлича ўраладиган рўмоллар, саллалар (локи, бошўров, дастор) кенг таништирилган.

Аёллар, келинчаклар ва болалар бош кийимларини ясатишда қўлланилган заргарлик буюмлари тўғрисидаги бўлим ҳам қизиқарлидир. Шунингдек эркаклар ва болалар бош кийимлари: саллалар, мўйнали телпаклар, кигиз телпаклар ва дўппиларга алоҳида бўлим бағишланган.

Китоб рангли фотосуратлар билан бойитилган, унинг матн қисми ўзбек, инглиз ва рус тилларида берилган.