Тошкент ҳайвонот боғига Фарғона ва Термиздан йўлбарс болалари келтирилди

Тошкент ҳайвонот боғига Фарғона кўчма циркидан Симба лақабли тўрт ойлик йўлбарс боласи келтирилди, дея хабар бермоқда муассаса матбуот хизмати.

Симба узоқ йўлдан ҳоригани ва қўрқиб қолгани учун уни боғдаги уч ойлик йўлбарсчалар — Шерхон ва Осиё билан битта жойга жойлаштиришга қарор қилишди. «Улар бир-бирига тез кўникиб, туғишган инилар каби иноқлашиб кетди», — дейилади хабарда.

Бир ҳафта ўтиб, уларга Термиз ҳайвонот боғидан юборилган Дарё лақабли йўлбарс боласи ҳам қўшилди. Уч ойдан буён улар бирга ўйнаб, бирга овқатланиб яшамоқда.

Айни пайтда улар шахсий хусусиятлари ва ўзаро яқинликларидан келиб чиқиб, жуфт-жуфт қилиб жойлаштирилди.