«Газета.uz» нашри 7 январь куни муштарийлар номидан хорижий давлатлардан жисмоний шахслар номига келаётган жўнатмаларнинг божхона расмийлаштируви тўхтатилган-тўхтатилмаганлигига ойдинлик киритишни сўраб, Давлат божхона қўмитасига мурожаат қилди. Қўмита 12 январь куни ўз сайтида унга жавоб берди.
Ўзбекистон Республикаси Давлат божхона қўмитаси хорижий давлатлардан жисмоний шахслар номига келаётган жўнатмаларнинг божхона расмийлаштируви тўхтатилмаганлигини маълум қилади, дейилади жавобда.
Қайд этилишича, Ўзбекистон Республикаси Божхона кодексининг 14-моддасига мувофиқ, жисмоний шахслар нотижорат мақсадлари учун мўлжалланган товарларни божхона чегараси орқали қонун ҳужжатларида назарда тутилган соддалаштирилган, имтиёзли тартибда олиб ўтишлари мумкин.
Ўзбекистон Республикаси Президентининг 2009 йил 1 июндаги «Жисмоний шахслар томонидан истеъмол товарларини олиб киришни тартибга солиш чора-тадбирлари тўғрисида»ги ПҚ-1118-сон қарорига биноан белгиланган «Ўзбекистон Республикаси ҳудудига жисмоний шахслар томонидан товарларни божсиз олиб киришнинг меъёрий нормалари»га (ЎзР Адлия вазирлиги томонидан 1996 йил 10 сентябрда 279-сон билан рўйхатдан ўтказилган) мувофиқ, жисмоний шахслар томонидан чегарадош бўлмаган давлатлар ҳудудидан умумий эквивалент қиймати 1000 АҚШ долларидан кўп бўлмаган истеъмол товарларини бож тўламасдан олиб кириш мумкин.
Шунингдек, мазкур имтиёзли тартиб халқаро почта жўнатмалари орқали жисмоний шахслар номига келган товарларга нисбатан ҳам қўлланилади. Бошқа барча жўнатмалар, шу жумладан курьерлик жўнатмаларига товарларни божсиз олиб кириш нормалари татбиқ қилинмайди ва ўрнатилган тартибда божхона тўловлари ундирилади.
Эслатиб ўтамиз, Ўзбекистон Республикасининг 2009 йил 22 апрелда қабул қилинган Янги таҳрирдаги «Почта алоқаси тўғрисида»ги Қонунига мувофиқ жўнатмалар почта ва курьерлик жўнатмаларидан иборатдир.
Юқоридагилар ҳамда амалдаги қонунчилик талабларидан келиб чиқиб,
1.Барча халқаро почта жўнатмалари почта жўнатмаси сифатида тасдиқланса божсиз олиб кириш нормалари қўлланилган ҳолда божхона расмийлаштируви амалга оширилади.
2. Барча курьерлик жўнатмаларининг амалдаги қонунчиликда назарда тутилмагани боис, товарларни божсиз олиб кириш нормалари қўлланилмаган ҳолда ва ўрнатилган тартибда божхона расмийлаштируви амалга оширилади.
Бугунги кунда Давлат божхона қўмитаси томонидан мазкур масалани ҳуқуқий жиҳатдан тартибга солиш мақсадида ваколатли орган – Ўзбекистон Республикаси алоқа, ахборотлаштириш ва телекоммуникация технологиялари давлат қўмитасига тегишли мурожаат йўлланди.
Изоҳ (0)