“Gazeta.uz” nashri 7-yanvar kuni mushtariylar nomidan xorijiy davlatlardan jismoniy shaxslar nomiga kelayotgan jo‘natmalarning bojxona rasmiylashtiruvi to‘xtatilgan-to‘xtatilmaganligiga oydinlik kiritishni so‘rab, Davlat bojxona qo‘mitasiga murojaat qildi. Qo‘mita 12-yanvar kuni o‘z saytida unga javob berdi.
O‘zbekiston Respublikasi Davlat bojxona qo‘mitasi xorijiy davlatlardan jismoniy shaxslar nomiga kelayotgan jo‘natmalarning bojxona rasmiylashtiruvi to‘xtatilmaganligini ma’lum qiladi, deyiladi javobda.
Qayd etilishicha, O‘zbekiston Respublikasi Bojxona kodeksining 14-moddasiga muvofiq, jismoniy shaxslar notijorat maqsadlari uchun mo‘ljallangan tovarlarni bojxona chegarasi orqali qonun hujjatlarida nazarda tutilgan soddalashtirilgan, imtiyozli tartibda olib o‘tishlari mumkin.
O‘zbekiston Respublikasi Prezidentining 2009-yil 1-iyundagi “Jismoniy shaxslar tomonidan iste’mol tovarlarini olib kirishni tartibga solish chora-tadbirlari to‘g‘risida”gi PQ-1118-son qaroriga binoan belgilangan “O‘zbekiston Respublikasi hududiga jismoniy shaxslar tomonidan tovarlarni bojsiz olib kirishning me’yoriy normalari”ga (O‘zR Adliya vazirligi tomonidan 1996-yil 10-sentabrda 279-son bilan ro‘yxatdan o‘tkazilgan) muvofiq, jismoniy shaxslar tomonidan chegaradosh bo‘lmagan davlatlar hududidan umumiy ekvivalent qiymati 1000 AQSh dollaridan ko‘p bo‘lmagan iste’mol tovarlarini boj to‘lamasdan olib kirish mumkin.
Shuningdek, mazkur imtiyozli tartib xalqaro pochta jo‘natmalari orqali jismoniy shaxslar nomiga kelgan tovarlarga nisbatan ham qo‘llaniladi. Boshqa barcha jo‘natmalar, shu jumladan kuryerlik jo‘natmalariga tovarlarni bojsiz olib kirish normalari tatbiq qilinmaydi va o‘rnatilgan tartibda bojxona to‘lovlari undiriladi.
Eslatib o‘tamiz, O‘zbekiston Respublikasining 2009-yil 22-aprelda qabul qilingan Yangi tahrirdagi “Pochta aloqasi to‘g‘risida”gi Qonuniga muvofiq jo‘natmalar pochta va kuryerlik jo‘natmalaridan iboratdir.
Yuqoridagilar hamda amaldagi qonunchilik talablaridan kelib chiqib,
1.Barcha xalqaro pochta jo‘natmalari pochta jo‘natmasi sifatida tasdiqlansa bojsiz olib kirish normalari qo‘llanilgan holda bojxona rasmiylashtiruvi amalga oshiriladi.
2. Barcha kuryerlik jo‘natmalarining amaldagi qonunchilikda nazarda tutilmagani bois, tovarlarni bojsiz olib kirish normalari qo‘llanilmagan holda va o‘rnatilgan tartibda bojxona rasmiylashtiruvi amalga oshiriladi.
Bugungi kunda Davlat bojxona qo‘mitasi tomonidan mazkur masalani huquqiy jihatdan tartibga solish maqsadida vakolatli organ – O‘zbekiston Respublikasi aloqa, axborotlashtirish va telekommunikatsiya texnologiyalari davlat qo‘mitasiga tegishli murojaat yo‘llandi.
Izoh (0)