КХДР етакчиси Ким Чен Инга суиқасд уюштирилиши ҳақидаги «Интервью» комедияли жангари фильми 25 декабрь, Рождество куни АҚШ ҳудудидаги 200 дан ортиқ мустақил кинотеатрларда намойиш этилади. Бундай қарорни кинолентани ишлаб чиқарган Sony Pictures компанияси қабул қилди, деб ёзади «РИА Новости».
Дастлаб фильмни АҚШдаги 3 мингта кинотеатрда кўрсатиш режалаштирилган эди. Sony Pictures компанияси компьютер тармоғига ҳужум уюштирган хакерлар «Интервью» премьераси бўладиган кинотеатрларда 2001 йил 11 сентябрдаги каби терактлар уюштириш билан таҳдид этгач, фильмнинг 25 декабрга мўлжалланган АҚШ премьераси бекор қилинган эди. Хакерлар айнан қандай хатти-ҳаракатларни амалга оширмоқчи бўлгани маълум қилинмади.
АҚШ президенти Барак Обама Sony Pictures’нинг хакерлар таҳдидларига қарамай, «Интервью»ни Америка кинотеатрларида намойиш этиш қарорини маъқуллади.
Изоҳ (0)