2014 йил 22 декабрь куни Ўзбекистон Миллий кутубхонаси 4-қаватида «Кореяга йўл» ихтисослашган ўқиш залининг очилиши бўлиб ўтди. Бу ҳақда Миллий кутубхона сайтида маълим қилинган.
«Ўқиш зали Корея Миллий кутубхонаси билан ҳамкорлик доирасидаги лойиҳа асосида ташкил этилган бўлиб, у шерикларимиз ва Ўзбекистондаги Корея Республикаси Элчихонаси томонидан тақдим этилган ахборот ресурслари билан жиҳозланган», − дейилади хабарда.
Очилиш маросимида Алишер Навоий номидаги Ўзбекистон Миллий кутубхонаси директори А. Ходжаев, Корея Миллий кутубхонаси директори - Рю Жунг Юнг ва Корея Республикасининг Ўзбекистондаги Фавқулодда ва Мухтор Элчиси -Ли Ук Хёнг сўзга чиқдилар. Шунингдек тадбирда «Мараги» корейс сўзлашув клуби аъзолари шеър ва қўшиқлар билан иштирок этдилар.
Корея Миллий кутубхонаси директори Рю Жунг Юнг «Мараги» корейс сўзлашув клуби аъзоларининг концерт чиқиши юзасидан таҳсин изҳор этди ва ўз нутқида ўзбекистонлик китобхонларга Корея тарихи, маданияти ва корейс тилига бўлган қизиқиши учун миннатдорлик билдирди.
«Ўзбекистон ва Корея ўртасидаги дипломатик алоқалар ўрнатилган 1992 йилдан буён барча жабҳаларда кўплаб лойиҳалар амалга оширилган. Мазкур корейс ўқиш залининг очилиши ҳам икки мамлакат ўртасидаги алоқаларнинг мустаҳкамланишида бир қадам бўлди. Биз бундан буён ҳам Корея адабиёти, санъати, маданияти ва тарихи билан қизиқувчилар бу ерда керакли маълумотларга эга бўлишига ҳаракат қиламиз», − деди меҳмон.
Корея Республикасининг Ўзбекистондаги Фавқулодда ва Мухтор Элчиси Ли Ук Хёнг эса ўз нутқида тадбирнинг юқори савияда ташкил этилганлигига урғу бериб Ўзбекистон Миллий кутубхонасига ўз миннатнатдорчилигини билдирди.
«Мен Ўзбекистон Миллий кутубхонасида корейс ўқиш залининг очилиши муносабати билан учрашиб турганимиздан хурсандман», − деди жаноб элчи. Шунингдек, Корея Миллий кутубхонасига дунёдаги кўплаб кутубхоналар орасида айнан шу ерни танлагани учун ҳам ўз миннатдорчилигини билдирди. «15 минг корейс тилини ўрганувчилар кутубхонага маълумот излаб келишларини инобатга олиб биз уларнинг кутубхонага мунтазам келиб туришларини таъминлашга ўз ҳиссамизни қўшамиз», − дея ўз сўзини мухтасар қилди меҳмон.
Жанубий Корея билан Ўзбекистонни катта масофа ажратиб турса-да, халқларимизни қадимий дўстлик ришталари боғлаб туради. Эл-юртга садоқат, аждодлар мероси ва қадриятларини қадрлаш, меҳр-оқибат, бағрикенглик, саховат, катталарга ҳурмат, кичикларга иззат, меҳнатсеварлик каби фазилатлар ўзбек ва корейс халқлари учун бирдек хосдир.
Миллий кутубхона фойдаланувчилари орасида корейс тили ва маданиятини ўрганишга қизиқувчилар кўплиги ва корейс тилидаги адабиётларга бўлган талабнинг кундан-кунга ортиб бораётгани алоҳида аҳамиятга эга. Фойдаланувчилар истакларини инобатга олган ҳолда Ўзбекистон Миллий кутубхонаси «Кореяга йўл» Халқаро лойиҳасида қатнашмоқда. Ушбу лойиҳанинг асосий мақсади - китобхонларни Жанубий Корея тарихи, урф-одатлари, мамлакатнинг сиёсий ислоҳотлари ва янги ютуқлари билан таништиришдир.
Миллий кутубхона «Кореяга йўл» лойиҳаси доирасида 3051 нусхадан ортиқ Жанубий Корея муаллифларининг тилшунослик, адабиёт, туризм, маданият, тарих соҳаларига оид корейс ва инглиз тилларидаги китоблари ва CD дискларини қабул қилиб олди.
Тантанали очилиш маросимидан аввал Ўзбекистондаги Корея Республикаси элчихонаси мутахассислари томонидан Корея сувенирларини ясаш бўйича маҳорат дарси бўлиб ўтди. Унда 50-сонли ихтисослаштирилган умумтаълим мактаби ўқувчилари ўз қўллари билан совғалар ясаш, уларга безак бериш ва яқинларига тақдим этиш бўйича тавсиялар олдилар.
Изоҳ (0)