АҚШнинг Калифорния штатидаги Сан-Диего шаҳри ҳайвонот боғида шимол оқ каркидонининг Ер юзида сақланиб қолган охирги эркаги вафот этди, деб хабар бермоқда Los Angeles Times. 1980 йиллар охирида Судандан келтирилган Ангалифу лақабли каркидон 44 ёшида табиий ўлим топган.
Зоологлар ушбу ноёб ҳайвон турини сақлаб қолишга умид қилиб, унинг олдига Нола лақабли урғочи каркидонни олиб келишган эди. Бироқ тутқунликда улар насл қолдира олмади. Сан-Диего атроф-муҳитни тадқиқ ва муҳофаза қилиш институти ходимларида ўлган каркидоннинг уруғлари қолган бўлиб, улар ёрдамида Ер юзида сақланиб қолган бошқа шимол оқ каркидони урғочиларидан насл олиш учун фойдаланишга умид қилишмоқда. Бундай урғочи каркидонларнинг учтаси Кенияда яшаса, яна бири Чехиядаги ҳайвонот боғида сақланади.
Каркидонларнинг ушбу тури 1960 йилда 2250 тани ташкил этган, бироқ браконьерлик оқибатида уларнинг сони йўқолиб кетиш даражасигача камайиб кетган. Унинг шохи даволовчи хусусиятларга эга деб ҳисоблангани учун қора бозорда нархи қиммат туриши қайд этилган. Шимол оқ каркидони жанублик қариндошидан каттароқ бўлиб, қуруқликда яшовчи ҳайвонлар ичида филдан кейин иккинчи энг йирик жонивор ҳисобланади.
Изоҳ (0)