Қоҳира суди Миср собиқ президенти Ҳусни Муборакни 2011 йилдаги намойишчилар ўлими иши бўйича оқлади, дея хабар бермоқда «Газета.ru».
Шунингдек, Муборак Исроилга газ экспорти ва коррупция ишлари бўйича ҳам оқланди. Судьялар уни барча айблов моддалари бўйича айбсиз деб топди.
Намойишчилар ўлими иши бўйича Миср ички ишлар вазирлиги собиқ раҳбари Ҳабиб ал Адлий ва унинг олти нафар ёрдамчилари ҳам оқланди.
Эслатиб ўтамиз, 2011 йил январь—февралидаги оммавий аксилҳукумат намойишларида юзлаб кишилар ўлими бўйича жиноий иш ўша йилнинг ёзидаёқ очилган, бироқ айбланувчиларга қарши далилларнинг етарли бўлмагани сабабли Ҳусни Муборак, унинг икки ўғли, собиқ ички ишлар вазири ва бошқаларга ҳукм чиқарилмаган.
2012 йил июнида Муборак барибир бир умрлик қамоқ жазосига ҳукм қилинди, бироқ томонлардан ҳеч бирини қониқтирмаган суд ҳукми устидан кузда шикоят аризаси тушди. Натижада 2013 йил апрелида суд процесси нулдан қайта бошланди.