Малайзиянинг Россиядаги элчихонаси савдо маслаҳатчиси ва Малайзиянинг ташқи савдони ривожлантириш билан шуғулланувчи корпорацияси (MATRADE)нинг МДҲ бўйича вакили Зайниддин Жалил Ўзбекистон Малайзиянинг Марказий Осиёдаги энг йирик савдо шериги эканлигини маълум қилди, деб ёзади UzDaily.
Унинг таъкидлашича, икки мамлакат ўртасидаги товар айланмаси 2013 йил якунларига кўра 71,5 миллион долларни ташкил этди, бу 2012 йилга нисбатан 9,1 фоизга кўп демакдир. Шу билан бирга, Малайзиянинг Ўзбекистонга экспорти 19,4 фоизга ошиб, 69,8 миллион долларга етди, Ўзбекистондан келадиган импорт эса 76,9 фоизга камайиб, 1,6 миллион долларгача тушиб кетди.
2014 йилнинг тўққиз ойи ичида эса давлатлар ўртасидаги товар айланмаси 42,5 фоизга ошган ва 72,3 миллион долларни ташкил қилган.
Зайниддин Жалилнинг таъкидлашича, Малайзиянинг Марказий Осиё давлатлари билан жами товар айланмасининг 41,2 фоизи Ўзбекистон ҳиссасига тўғри келади.
Бундан ташқари, Малайзиянинг Марказий Осиёга экспорти ҳажмининг 49,2 фоизи, минтақадан Малайзияга келтириладиган импорт ҳажмининг 35,5 фоизи Ўзбекистон улушига тўғри келади.
Изоҳ (0)