Ўқув муассасалари ва касалхоналар ҳуқуқбузарликлар ҳақида хабар қиладиган бўлди

Ўзбекистон Ички ишлар вазирлиги, Соғлиқни сақлаш вазирлиги, Олий ва ўрта махсус таълим вазирлиги, Халқ таълими вазирлигининг биргаликдаги қарори билан Ҳуқуқбузарликлар фактлари ҳамда ҳуқуқбузарликлар билан боғлиқ бошқа ҳолатлар ҳақида ички ишлар органларига хабар қилиш тартиби тўғрисидаги йўриқнома тасдиқланди (pdf).

Ҳужжатга мувофиқ, таълимни давлат томонидан бошқариш органлари ва таълим муассасалари ички ишлар органларига:

• ҳуқуқбузарликлар фактлари ҳақида;
• одамларнинг ҳаётига таҳдид соладиган оилавий-маиший низолар ҳақида;
• таълим олувчи шахслар ғайриижтимоий хулқ-атворга ва ҳуқуқбузарликлар содир этишга жалб этилганлиги ҳақида;
• ҳуқуқбузарликлар содир этишга мойил бўлган шахслар ҳақида хабар қилиши шарт.

Давлат соғлиқни сақлаш тизимини бошқариш органлари ва соғлиқни сақлаш муассасалари ички ишлар органларига:

• ижтимоий аҳамиятли касалликлар ва атрофдагилар учун хавф солувчи бошқа касалликлар тарқалганлиги ҳақида;
• баданига шикаст етган ёхуд беҳуш ҳолатда бўлган шахслар келиб тушганлиги ҳақида;
• одамларнинг ҳаётига таҳдид соладиган оилавий-маиший низолар ҳақида;
• вояга етмаган шахслар ғайриижтимоий хулқ-атворга ва ҳуқуқбузарликлар содир этишга жалб этилганлиги ҳақида;
• ҳуқуқбузарликлар содир этишга мойил бўлган шахслар ҳақида хабар қилиши шарт.

Ҳуқуқбузарликлар фактлари аниқланган тақдирда таълим муассасалари ёки соғлиқни сақлаш муассасалари томонидан зудлик билан ҳудудий ички ишлар органи навбатчилик қисмига телефон орқали хабар қилиниши шарт.