Сирдарё вилоятида яшовчи фуқаро ўз маҳалладошларини 400 минг қозоқ тенгеси эвазига сотиб юборди. Бу ҳақда «Ҳуқуқ» газетасига таяниб «Uz24.uz» хабар берди.
Сирдарёлик фуқаро маҳалладошларидан бирига Қозоғистонда иш таклиф қилиб, ўзи яқинда ишлаб келганини, у ерда танишлари борлигини айтади ҳамда ишсиз юрган қўшни йигитларни ҳам таклиф қилишини қўшимча қилади.
Маҳалладошининг сафига яна икки йигит қўшилади ва айбланувчи уларга Қозоғистонда ойлик 75 минг тенгени ташкил этишини, ётоқхона, овқат текинлигини айтиб, Чиноз тумани Яллама чегара постидан олиб ўтади. Сўнгра, Қозоғистон Республикаси Чимкент вилоятида яшовчи шахс билан учраштиради ва 400 минг қозоқ тенгеси эвазига уларни сотиб юборади.
Одам савдоси «қурбонлари» эса ўзга юртда қурилишдаги оғир ишларни бажаришга мажбур бўлади. Оғир меҳнат ва таҳқирлашлар 3 ой деганда йигитларни ҳолдан тойдиради. Иш ҳақидан дарак бўлмагач, улар иш берувчига учраб, иш ҳақларини талаб қилишганда маҳалладоши томонидан пуллаб юборилганидан хабар топади.
Хорижда ишлаб, мўмайгина пул топаман, деган хомхаёлга берилган йигитлар хору зорликни бошдан кечириб, ўз юртларига қайтиб келди.Айбланувчи эса Сирдарё туман судининг ҳукми билан 6 йил муддатга озодликдан маҳрум этилди.
Изоҳ (0)