Хоразм вилоятидан бўлган шахс бошқа давлатга ишлагани кетди. У ўзга юртдалигида уйига жияни бир қоп сабзи кўтариб келди, деб хабар бермоқда Ўзбекистон Ички ишлар вазирлигининг «Постда» газетаси.
Хонадон соҳибасига сабзи тўла қопни ичкарига олиб киришга ёрдамлашар экан, жиян хона эшигини секин беркитиб, аёлга тегажоғлик қила бошлади. Уй бекаси эса уни силтаб, ошхонага чиқиб кетди. Йигит аввалига уйига кетмай, аёлни кутиб турди. Салдан сўнг, кейин келишини айтиб чиқиб кетди.
Хонадон бекаси бўлиб ўтган воқеани бироз вақтдан сўнг ўзга юртдан қайтган турмуш ўртоғига айтиб берди. Уй соҳиби жияни билан ўзи гаплашишини айтди-ю кўп ўтмай яна ишлашга кетди.
Аёлининг бетоб бўлиб қолгани боис икки йилдан сўнг уйига қайтган киши аввал бўлган воқеани ёдга олиб, қариндошини излаб борди ва у билан биргаликда овлоқ жой томон кетди. Бу ерда у аёлига шилқимлик қилган қариндошининг узрларини ҳам эшитиб ўтирмай, уни калтаклай кетди. У қариндоши жимиб қолгачгина ўзига келди ва жиянининг тириклигини билиб, поччасига қўнғироқ қилди.
Поччага айтилганидек, «йиқилиб, шикастланган жиян» шифохонага олиб борилди, бироқ кўп калтаклангани боис ҳаётини сақлаб қолишнинг иложи бўлмади.