Жанубий Кореянинг Инчеон шаҳрида ўтказилаётган ПараОсиё ўйинларида ўзбекистонлик спортчилар зафарли одимлашда давом этишмоқда, деб ёзади Миллий олимпия қўмитаси.
Бугун енгил атлетиканинг 200 ҳамда 800 метр масофага югуриш бўйича ўтказилган мусобақаларида Ўзбекистон шарафини ҳимоя қилган спортчилар яна 2 та олтин, 1 та кумуш ва 1 та бронза медалини қўлга киритди.
200 метр масофага югуриш мусобақасида марра чизиғига 23:10 сонияда етиб келган Фахриддин Ҳамроев ПараОсиё ўйинларининг олтин медалига сазовор бўлди. Бу Фахриддиннинг мазкур ПараОсиё ўйинларидаги иккинчи олтин медалидир. Бунга қадар у 800 метр масофага югуриш мусобақаларида ҳам Осиёнинг энг кучли спортчиси деган номга сазовор бўлган эди.
Худди шу масофага югуриш бўйича ўтказилган мусобақада иштирок этган яна бир юртдошимиз Миран Сахадов 24:43 сония натижа кўрсатиб, кумуш медаль совриндори бўлди.
Бугунги мусобақаларда делегациямиз ҳисобига иккинчи олтин медални 800 метр масофага югуриш мусобақасида иштирок этган Маъруфжон Муродиллаев келтирди. Белгиланган масофани 1:57.88 сонияда босиб ўтган ҳамюртимиз, олтин медални қўлга киритиш билан бирга, ПараОсиё ўйинлари рекордини ҳам янгилашга муваффақ бўлди.
Эслатиб ўтамиз, Маъруфжон Муродиллаев 20 октябрь куни 1500 метр масофага югуриш бўйича бўлиб ўтган мусобақада ҳам олтин медални қўлга киритиш билан бирга, Осиё рекордини ҳам янгилаган эди.
Ушбу масофага югуриш мусобақасининг финал босқичида иштирок этган яна бир юртдошимиз Сирожиддин Норов марра чизиғини 2:05.14 сонияда босиб ўтди ва ПараОсиё ўйинларининг бронза медали совриндори бўлди.
Шу тариқа, енгил атлетикачиларимиз томонидан қўлга киритилган медаллар сони 11 тага етди (6 та олтин, 3 та кумуш, 2 та бронза).
Шу ўринда таъкидлаш жоизки ПараОсиё — 2014 ўйинларида сузиш мусобақаларида иштирок этган Кирилл Панков (4 та) ва Дмитрий Хорлин (3 та) жами 7 та олтин медалга сазовор бўлишган бўлса, дзюдо усталаримиз жами 9 та медални (7 та олтин, 1 та кумуш, 1 та бронза) қўлга киритдилар.
Айни дақиқаларга келиб Ўзбекистон делегацияси ҳисобида 20 та олтин, 4 та кумуш, 3 та бронза медали мавжуд ва ҳамюртларимиз умумжамоа ҳисобида 41 давлат орасида 5-ўринда боришяпти.
Изоҳ (0)