Қозоғистон Парламенти юқори палатаси депутати Мурод Бахтиёрўғли ҳукумат раҳбарига мурожаат қилар экан, мамлакатда чилим (кальян) чекишни тўлиқ тақиқлашни таклиф қилди. Бу ҳақда Tengrinews.kz хабар бермоқда.
У қонунчиликда тамаки чекишни чекловчи қонун доирасида сунъий тамаки маҳсулотлари, жумладан чилимни тўлиқ тақиқлаш ташаббуси билан чиқди. «Бундай чоралар янги авлод учун ўта зарур деб ҳисоблаймиз», — деди у.
Нашрнинг эслатишича, 2013 йилда Қозоғистон соғлиқни сақлаш вазирлиги ҳордиқ учун мўлжалланган жамоат жойларида чилим чекишни ман қилган эди. Бунга чекиш найида ва чилим суюқлигида ичак таёқчалари, стафилококк, ачитқи, замбуруғ ва бошқа микроблар аниқлангани сабаб бўлган эди.
Депутатнинг айтишича, киритилган тақиққа қарамай, қозоғистонликлар қаҳвахона ва ресторанларда чилим чекишда давом этмоқда.
Изоҳ (0)