Ўзбекистон миллий университети талабаларидан ҳожатхонадан фойдаланиш учун 300 сўм тўлов олиниши маълум бўлди. Бу ҳақда шу ОТМ талабаларидан бири Facebook’даги Potrebitel.uz гуруҳида хабар қолдирди.
«Шартнома пулини миллионлаб тўлаймиз, бунга эса нима дейсиз?» — деб ёзади фойдаланувчи.
Ушбу пост тез вақт ичида кўплаб изоҳлар йиғди. Гуруҳ аъзоларининг бир қисми ҳожатхона учун тўловни раҳбарият жорий қилмаслигини, бу фаррошлар ғояси эканлигини таъкидлади. Улар хабар муаллифига бу масалани ректоратга мурожаат қилиш орқали ҳал этишни маслаҳат беришди.
Постга фикр билдирганларнинг яна бир қисми ўзлари ҳам шундай вазиятга тушганини, талабалардан бундай тўловнинг ундирилиши адолатсиз эканини қайд этди. «Пул тўланганга яраша ҳожатхоналар тоза бўлиб турса ҳам майли эди», — деб ёзади улардан бири.
Изоҳ ёзганларнинг яна бир гуруҳи эса бу овоза қилишга арзийдиган муаммо эмаслиги, фаррошлар меҳнати учун 300 сўм ҳеч гап эмаслигини таъкидлаган. «Миллионлаб пул тўласангиз, 300 сўмга ачинасизми?» — дея писанда қилди фойдаланувчилардан бири.
Узоқ давом этган баҳслардан сўнг гуруҳ аъзолари талабалар иттифоқи томонидан умумий жамғарма тузилиб, унинг ҳисобидан ҳожатхоналар тозалигини таъминлаш таклифини киритди. Фаррошларни ёллаш, уларни ойлик билан таъминлаш ва тозаликни назорат қилиб туришга ҳам талабалар жавобгар бўлиши уларнинг ўз соғлиғига фойда эканлиги таъкидланди.
Таъкидлаш жоиз, ҳожатхонадан фойдаланиш учун тўлов талаб қилиш университет ташаббусими, йўқми — номаълум.
Изоҳ (0)