Ижтимоий тармоқларда Бешариқ туманида “ёввойи” кимса пайдо бўлгани ва аёллар, болаларга ташланиб қолаётгани ҳақида хабарлар тарқалди. Ҳолат Фарғона вилояти ИИБ томонидан ўрганиб чиқилди.
Мазкур ҳолат юзасидан ўтказилган тезкор қидирув ҳамда терговга қадар текширув ҳаракатлари давомида фуқаролар томонидан айтиб келинаётган “яланғоч одам”, “ёввойи одам”ни ҳеч бир шахс кўрмагани, унинг тасвири видеокузатув камераларига тушмагани, қолаверса мазкур ҳолат сунъий шов-шув кўтариш учун тарқатилган ёлғон хабар экани маълум бўлди.
“Ҳурматли фуқаролар, юқоридаги каби хабарларга ишониб, ноўрин хулосага борманг. Ижтимоий тармоқ фаолларини бу каби асосланмаган маълумотларни тарқатмасликка чақирамиз”, дейилади хабарда.
Бундан аввал ижтимоий тармоқларда Зомин миллий табиат боғида йўл бўйида айиқ юргани ҳақида видео тарқалган эди. Зомин миллий табиат боғи назоратчилари томонидан ҳудудни тунда назорат қилиш чоғида йўл бўйида айиқ юрганининг гувоҳи бўлган ва бу ҳолат мобил тасвирга олинган. 14 май куни Миллий боғ матбуот хизмати томонидан бу тасвир ўз расмий каналига жойланган ва тармоқ фойдаланувчилари томонидан бу ҳолат нотўғри талқин этилиб тарқатилган.
Изоҳ (0)