O‘zbekiston milliy universiteti talabalaridan hojatxonadan foydalanish uchun 300 so‘m to‘lov olinishi ma’lum bo‘ldi. Bu haqda shu OTM talabalaridan biri Facebook’dagi Potrebitel.uz guruhida xabar qoldirdi.
“Shartnoma pulini millionlab to‘laymiz, bunga esa nima deysiz?” — deb yozadi foydalanuvchi.
Ushbu post tez vaqt ichida ko‘plab izohlar yig‘di. Guruh a’zolarining bir qismi hojatxona uchun to‘lovni rahbariyat joriy qilmasligini, bu farroshlar g‘oyasi ekanligini ta’kidladi. Ular xabar muallifiga bu masalani rektoratga murojaat qilish orqali hal etishni maslahat berishdi.
Postga fikr bildirganlarning yana bir qismi o‘zlari ham shunday vaziyatga tushganini, talabalardan bunday to‘lovning undirilishi adolatsiz ekanini qayd etdi. “Pul to‘langanga yarasha hojatxonalar toza bo‘lib tursa ham mayli edi”, — deb yozadi ulardan biri.
Izoh yozganlarning yana bir guruhi esa bu ovoza qilishga arziydigan muammo emasligi, farroshlar mehnati uchun 300 so‘m hech gap emasligini ta’kidlagan. “Millionlab pul to‘lasangiz, 300 so‘mga achinasizmi?” — deya pisanda qildi foydalanuvchilardan biri.
Uzoq davom etgan bahslardan so‘ng guruh a’zolari talabalar ittifoqi tomonidan umumiy jamg‘arma tuzilib, uning hisobidan hojatxonalar tozaligini ta’minlash taklifini kiritdi. Farroshlarni yollash, ularni oylik bilan ta’minlash va tozalikni nazorat qilib turishga ham talabalar javobgar bo‘lishi ularning o‘z sog‘lig‘iga foyda ekanligi ta’kidlandi.
Ta’kidlash joiz, hojatxonadan foydalanish uchun to‘lov talab qilish universitet tashabbusimi, yo‘qmi — noma’lum.
Izoh (0)