Facebook’даги «Водители Ташкента» («Тошкент ҳайдовчилари») гуруҳи аъзоларидан бири Тошкентда кузатув камералари ўрнатиладиган чорраҳалар рўйхатини гуруҳга жойлади.
«Тошкент шаҳрида йўл ҳаракати хавфсизлигини бошқариш ва жамоатчилик тартибини сақлашнинг компьютерлашган тизимини яратиш» деб номланган ушбу ҳужжатдан пойтахтдаги 120 та чорраҳа ўрин олган.
«Эксклюзив! Камералар ўрнатиладиган 120 та кўча ва чорраҳалар рўйхати. Тизимни ишга тушириш санаси — 2015 йил март», — деб ёзади муаллиф. Шунингдек у фойдаланувчиларни бунга олдиндан тайёргарлик кўриб, қоидаларни бузмасликни машқ қилишга чақириб қолган.
Таъкидлаш жоиз, ушбу рўйхатнинг расмийлиги мутасадди давлат органлари томонидан тасдиқланмаган.
Постга фикр билдирганларнинг бир қисми бундай тадбирларнинг қўлланилаётганидан мамнунлик билдириб, шаҳарда қоидабузарликлар камайишига умид билдириб қолган. Бироқ баъзи фойдаланувчилар энди қоида бузиб бўлмасликдан афсусланиб, камералар ўрнатилишига қарши чиққан.
Таъкидлаш жоиз, сўнгги бир неча ой ичида Тошкентдаги чорраҳаларга кузатув тизимини ўрнатиш ишлари олиб борилмоқда. Камералар ва диспетчерлик маркази ўртасида алоқа ўрнатиш учун «Ўзбектелеком» АК алоқа линияларини ўтказмоқда.
Ўзбекистонда йўл ҳаракати хавфсизлигининг компьютерлашган тизимини Швейцариянинг AGT International корпорацияси жорий қилмоқда.
Камераларни аввал Тошкентда, сўнг Самарқандда, ундан кейин эса бутун республика бўйлаб ўрнатиш режалаштирилмоқда.
Дастлаб Тошкентдаги 120 та чорраҳага камералар ўрнатиш ва бунинг учун 1200 та камера сотиб олиш кўзда тутилган эди. Якунда камера билан жиҳозланадиган чорраҳалар сони 160 тагача кўпайтиргани хабар қилинди.
Изоҳ (0)