Фарғона вилояти маъмурий марказида қурилиш-ободонлаштириш ишлари изчил олиб борилмоқда, дея хабар бермоқда «Кун» «Туркистон-пресс» ахборот агентлигига таяниб.
Маълум қилинишича, Фарғона шаҳри марказий кўчалари бўйлаб 11,4 минг тупга яқин манзарали дарахтлар экилган.
Хусусан, Мустақиллик ва Аҳмад Фарғоний кўчаларида каштан дарахтлари галереяси, япон софоралари ва бошқа манзарали ўсимликлар ансамблини кўриш мумкин.
Эски ёғ-мой комбинати ўрнида қад ростлаган минг ўринли санъат саройи ҳудудида, шунингдек, Оқариқ-Навоий чорраҳасида, Қувасой, Ўзбекистон кўчаларида янги фавворалар барпо этилган.
Аҳмад Фарғоний номидаги истироҳат боғида Қўғирчоқ театри биноси фойдаланишга топширилган бўлса, Ҳарбийлар шаҳарчасида кўп қаватли 34 та тураржой биноси қуриб битказилди.
Шаҳарда 27 километрга ичимлик суви, 15 километрга электр, 18 километрга газ тармоқлари янгидан тортилди, 110 та трансформатор капитал таъмирланди.
Бир сўз билан айтганда, 40 мингдан ортиқ аҳолининг ичимлик суви, иссиқлик манбаи, электрга бўлган эҳтиёжи тўлиқ қондирилди, дейилади «Туркистон-пресс» хабарида.
Изоҳ (0)