Сурхондарёлик Раҳматуллоҳ қори «Минор» жомеъ масжидининг имом-хатиби этиб тайинланди

«Минор» жомеъ масжидига Раҳматуллоҳ Сайфуддинов имом-хатиб этиб тайинланди. Qadriyat.uz’га таяниб, «Кун»нинг хабар беришича, бу ҳақдаги қарор Ўзбекистон мусулмонлари идораси уламолар кенгаши томонидан қабул қилинган.

Раҳматуллоҳ қори Ҳабибуллоҳ ўғли 1975 йил 18 май куни Сурхондарё вилоятининг Музробот туманида таваллуд топган бўлиб, Бухородаги «Мир Араб» мадрасасини ва Имом Бухорий номидаги Тошкент ислом институтини (1995-1999) тамомлаган.

Бунгача у Тошкент шаҳрининг Шайхонтоҳур туманидаги «Оқ тунукали» масжидида имом-хатиб, Юнусобод туманидаги «Мирзо Юсуф» жомеъ масжиди ноиби, имом, «Юнусобод Оқтепа» жомеъ масжиди имом-хатиби, «Хўжа Аламбардор» жомеъ масжиди имом-хатиби вазифасида фаолият олиб борган.

Унинг илмий-ижтимоий, диний-маърифий мавзудаги 60 га яқин теле ва радио эшиттиришлари эфирга узатилган. 500 га яқин мақолалари, «Ҳалол савдо касбларнинг яхшиси» номли китоби чоп этилган. Жума мавъизалари жамланган 10 та CD альбоми чиқарилган. Раҳматуллоҳ Сайфуддинов 2011 йилнинг «Энг намунали имоми», 2012 йилнинг «Энг фаол имом хатиби» кўрик-танловларида ғолиб чиққан.

Эслатиб ўтамиз, 1 октябрь, чоршанба куни Тошкентда янги қуриб битказилган ва уч минг намозхонга мўлжалланган «Минор» масжиди фойдаланишга топширилди.