1 октябрь куни, Қурбон ҳайити арафасида Ислом Каримов Тошкентда қуриб битказилган «Минор» масжидига ташриф буюрди, дея хабар бермоқда ЎзА.
Давлат раҳбари муҳташам мажмуани ва унинг атрофида олиб борилган ободонлаштириш ва кўкаламзорлаштириш ишларини кўздан кечирди.
«Ислом Каримов масжиднинг ички ва ташқи кўриниши, баҳаво айвонлари, миллий ўймакорлик услубида ишланган устунлар, бино қуббасидаги олтин суви билан зийнатланган нақшларни кўздан кечириб, қўли гул усталарнинг меҳнатига муносиб баҳо берди, — дейилади хабарда. — Айни вақтда нафақат мамлакатимиз, балки минтақамизда ягона, бетакрор бўлган ушбу дину диёнат маскани ҳар жиҳатдан мукаммал бўлиши, бу ерга тоат-ибодат ниятида келадиган мўмин-мусулмонлар учун ҳар томонлама қулай шароит яратиш бўйича қурувчи ва мутахассисларга зарур топшириқ ва кўрсатмалар берди».
Эслатиб ўтамиз, Ислом Каримов шу йилнинг 18 июль куни бу масканда бўлиб, қурилиш ишлари билан танишган эди. Президент бу ерда моҳир қурувчи, муҳандис ва усталарнинг фаолияти билан танишар экан, амалга оширилган бунёдкорлик ишлари ҳақида фикр билдириб, мажмуани янада такомиллаштириш бўйича муҳим кўрсатма ва тавсиялар берган эди.
Изоҳ (0)