Microsoft Windows 10 операцион тизимини тақдим этди

30 сентябрь куни Microsoft компанияси Windows операцион тизимининг Windows 10 деб номланган янги версиясини тақдим этди. Бу ҳақда The Verge маълумотига асосланиб «Пароль» нашри хабар берди.

Аввалроқ ушбу операцион тизимнинг янги версияси Windows 9 ёки бошқа бирор бир ном билан номланиши кутилаётган эди. Аммо ҳеч ким Windows’нинг янги версияси Windows 10 деб номланишини тахмин қилмаган эди.

Windows 10 операцион тизими Windows 7 билан ўхшаш ва Windows 8’дан айрим хусусиятларни ўзига олган. Бу билан янги Windows версияси сенсорли экран ва клавиатура ҳамда сичқонча ёрдамида компьютердан фойдаланувчиларнинг барчасига мос келади.

Эслатиб ўтамиз, Windows 7 клавиатура ва сичқончада компьютердан фойдаланувчилар учун қулай, Windows 8 эса сенсорли экранга эга компьютерлар учун ишлаб чиқарилган ва кўпчиликка айнан шу хусусияти сабаб маъқул келмаган эди.

Янги версияга бир қанча иш столлари билан ишлаш функцияси қўшилган. Бунда бир нечта иш столида алоҳида вазифаларни бажариш ва улардан бир-бирига маълумотларни кўчириш мумкин.

Windows 10’га яна Start Menu – «Пуск» тугмаси қайтарилган ва ундаги излаш функцияси такомиллаштирилган.

Тақдимотда Windows’нинг ўнинчи версияси 4 дюймдан 80 дюймгача бўлган дисплейлар учун мўлжалланган деб айтилди. Бундан тушуниш мумкинки, янги Windows версияси телефон, планшет ва компьютерлар учун бирдек мўлжалланган.

Шунингдек, Windows'га «One product family. One platform. One store» – битта маҳсулот оиласи, битта операцион тизим, битта дўкон дея таъриф берилди.

Тақдимот сўнгида нима учун Windows’нинг янги версияси айнан Windows 10 деб номлангани сўралди. Windows раҳбари Терри Миэрсоннинг сўзларига кўра, янги версия тақдим этилганидан сўнг уни ишлатиб кўриб, нима учун айнан Windows 10 деб номланганини тушуниб олиш мумкин.

Ҳозирда исталган киши Windows Insider Program’га аъзо бўлиб, Windows 10 операцион тизимини синаб кўриши мумкин. Windows 10’нинг тўлиқ тури эса 2015 йилнинг иккинчи ярмида барча учун фойдаланишга топширилади.

Windows 10 дизайнига бир қанча ўзгаришлар киритилган бўлиб, тизим скриншотларини «Пароль» нашрининг ушбу фотожамланмасида томоша қилишингиз мумкин.