Путин Ассоциация ҳақидаги битимнинг савдо қисми кечиктирилаётган 15 ой муддатда ҳужжат матнига кенг кўламдаги ўзгартиришлар киритилишини талаб қилди. Бу ҳақда Россия президентининг Еврокомиссия президенти Жозе Мануэль Баррозуга ёзган мактубида айтилади, дея хабар бермоқда «Европейская правда» нашри.
«Биз аввалгидек, ушбу ҳужжат кучга кириши натижасида Россия-Украина иқтисодий алоқалари ва бутун Россия иқтисодиётида юзага келадиган рискларнинг барчасини ҳисобга олган ҳолда, Ассоциация тўғрисидаги битимга тизимли ўзгартиришлар киритишгина бизга Россия Федерацияси ва Украина ўртасидаги мавжуд савдо-иқтисодий алоқаларни сақлаб қолиш имконини беради, деб ҳисоблаймиз», — деб ёзади Путин ўз мактубида.
У шунингдек, Украина қонунларини ЕИ қоидаларига мослаш мақсадида ўзгартириш учун қилинган ҳар қандай қадам келишувни бузиш ҳисобланиши ва унга жавобан Россия чоралар кўриши ҳақида огоҳлантирди.
Европа мансабдорлари эса ўзгартиришлар киритиш мумкин эмаслиги ҳақида айтмоқда. ЕИнинг савдо масалалари бўйича комиссари Карел де Гюхтнинг таъкидлашича, келишув ортга сурилган муддат давомида Киевга ўз ички стандартларини тартибга солиш тақиқланмаган.
«Руслар бунга ‘тайм-аут’ сифатида эмас, учинчи томонни жалб этиб, шу тариқа битимни йўқ қилиш имконияти деб қарамоқда», — дея қўшимча қилди у.
Изоҳ (0)