Туркманистоннинг раҳбар мансабдорлари қора рангли Mercedes хизмат машиналарини оқ рангдаги худди шундай автомобилларга алмаштирди, дея хабар бермоқда «РИА Новости» мамлакат ҳукуматидаги манбасига таяниб.
Маълум бўлишича, вазирликлар, идоралар, ташкилот ва муассасалар раҳбарларининг 160 нафари биринчилардан бўлиб оқ рангли Mercedes-Benz E 300 автомашиналарига эга бўлган. Энг сўнгги бўлиб Туркманистон ОАВлари раҳбарлари — газета, журналлар бош муҳаррирлари, телевидение ва радио раҳбарлари ўз автомобилларини ўзгартирган.
Ҳозирги пайтда қора Mercedes автомобиллари вилоят ва туманлар раҳбарияти томонидан ишлатилишда давом этмоқда. Бироқ Mercedes машиналари тақдим этилган амалдорларнинг барчасига оқ моделларни бериш кўзда тутилган.
Президент Гурбангули Бердимуҳаммедов бу борада намуна кўрсатди: оммавий тадбирларга одатда қора лимузинда келдиган давлат раҳбари сўнгги вақтларда оқ рангдаги машинада пайдо бўлмоқда.
Раҳбарлар машиналарининг нима сабабдан алмаштирилаётгани, кўп сонли премиум-класс қора Mercedes’лар энди қай тарзда ишлатилиши номаълум.
Таъкидлаш жоиз, Mercedes-Benz E 300’нинг ҳар бири 100 минг доллардан зиёд нархга эга.
Изоҳ (0)