Лондон университети профессори Москвадаги боғда адашиб қолиб, ҳалок бўлди

Лондон университети профессори Алексей Червоненкис Москвадаги «Лосиный остров» боғи ҳудудида адашиб қолиб, ҳалок бўлди, дея хабар бермоқда Interfax.

76 ёшли олим 21 сентябрь куни «Лосиноостровская» платфомаси бўйлаб сайрга чиқиб кетади, бироқ қоронғи тушгач ҳам уйига қайтиб келмайди. Кечаси у қариндошларига қўнғироқ қилиб, адашиб қолганини маълум қилади.

«Зудлик билан қидирув отряди тузилди. У мутахассислар билан биргаликда профессорнинг 100 дан ортиқ ҳамкасб ва талабаларидан иборат бўлди, бироқ қидирувлар муваффақият келтирмади. Олимнинг жасади эртаси куни вертолёт ёрдамида топилди», — дейилади Лондон университети сайтида.

Подмосковье полицияси хабарига кўра, аниқланган жасадда зўравонлик белгилари бўлмаган. Ҳуқуқни муҳофаза қилиш органларининг аниқлик киритишича, Алексей Червоненкис совқотишдан ҳалок бўлган.

Марҳум профессорнинг хотини айтишича, у яқинда жиддий операцияни бошидан кечирган, шу туфайли унинг организми заифлашиб қолган бўлган.

Алексей Червоненкис 1938 йил 7 сентябрда туғилган. У Россия Фанлар академиясининг Бошқарув муаммолари университетида етакчи ходим, шунингдек Лондон университети коллежида профессор бўлиб ишлаган. Олим математик статистика, машина билан ўқитиш назарияси ва унинг қўлланилиши билан шуғулланган. У математик Владимир Вапник билан биргаликда ўзларининг эмпирик маълумотлар бўйича боғланишларни қайта тиклаш статистик назариясини ишлаб чиққан, у Вапник-Червоненкис назарияси деб аталади.