Шотландияда маҳаллий вақт билан 7:00 (Тошкент вақти билан 11:00)да референдумда овоз бериш участкалари очилди, дея хабар бермоқда «РИА Новости».
Бюллетендаги ягона савол «Шотландия мустақил давлат бўлиши керак деб ўйлайсизми?»дан иборатдир.
Шотландияда яшовчи Британия фуқаролари, Британия Ҳамдўстлигининг 52 давлати фуқаролари, ЕИнинг 27 давлати фуқаролари ва лордлар палатаси аъзолари, шунингдек Шотландиядаги сайлов участкаларида рўйхатдан ўтган, бироқ айни дамда Буюк Британия ёки чет элда бўлган ҳарбий хизматчилар овоз бериш ҳуқуқига эга.
Ёш чегараси одатдаги 18 дан 16 гача туширилди. Рўйхатдан ўтган сайловчиларнинг умумий сони 4 миллион 285 минг 323 кишини ташкил этди. 789 минг киши овоз бериш учун почта орқали рўйхатдан ўтди.
Агар Шотландия аҳолисининг кўпчилик қисми референдумдаги саволга «ҳа» деб жавоб берса, 2016 йилнинг 24 мартида мамлакат Бирлашган Қироллик таркибидан чиқади.
Сайлов участкалари маҳаллий вақт билан 22:00 да ёпилади, шундан сўнг овозларни ҳисоблаш бошланади.
1707 йилдан буён Англия билан қонуний тузилган иттифоқда бўлган Шотландия 1997 йилда чекланган автономияга эга бўлган эди. 1999 йилдан унинг ҳудудида ўз парламенти ва ижро этувчи ҳукумати фаолият олиб бормоқда. Бироқ уларнинг ваколати асосан таълим, маданият, соғлиқни сақлаш, транспорт, атроф-муҳит муҳофазаси ва шунга ўхшаш соҳалар билан чегараланган. Шунингдек, Шотландия ўз суд тизимига ҳам эга.
Мутахассислар Шотландия мустақилликка эришса, бу мамлакатдан ядро қуролларини олиб чиқиб кетишнинг ўзигина Британия ҳукуматига 2,5 миллиарддан 3,5 миллиард фунт стерлинггача (4,2—5,9 миллиард доллар)тушиши мумкинлигини айтмоқда.
Изоҳ (0)