17 сентябрь, чоршанба куни АҚШнинг Техас штатида 38 ёшли Лиза Коулман исмли аёлга нисбатан ўлим жазоси ижро этилди. Унинг айби билан 2004 йилда тўққиз ёшли бола очликдан вафот этган, дея хабар бермоқда ИТАР-ТАСС штат ҳукуматига таяниб.
Коулманга Хансвилл шаҳрида ўлим инъекцияси юборилди. У АҚШда жорий йилда қатл этилган иккинчи, 1976 йилдан буён эса 15-аёл бўлди. Ўша йили Олий суд мамлакат ҳудудининг катта қисмида ушбу жазо чорасини қайта тиклаган эди. 1976 йилдан ҳозирга қадар Техас штатида жами 517 киши қатл этилган, бу Американинг бошқа ҳар қандай штатидаги кўрсаткичдан юқоридир.
2004 йилнинг июлида аёлнинг Арлингтон шаҳридаги уйида у билан бирга турган дугонаси — Марселла Уильямснинг ўғли — Девонти Уильямсга тегишли жасад топилган. Кейинроқ патолог-анатомлар боланинг очликдан ўлганини аниқлаган. Шифокорлар ҳисоб-китобига кўра, у ўлими олдидан 15 килограмм вазн босган, бу ўз ёшидаги меъёрдан тахминан икки марта камдир. Боланинг танасида шунингдек, калтаклар ва қийноқ излари ҳам топилган.
Коулманнинг адвокатлари Девонти Уильямснинг ўлими бахтсиз ҳодиса бўлганини исботлашга уринишди. Уларнинг айтишича, бола руҳан носоғлом бўлган, унинг онаси ва дугонаси у билан қандай муносабатда бўлишни билмаган. Шунга қарамай, 2006 йилда суд Коулманни айбдор деб топди. Боланинг онаси эса айбини тан олгач, бир умрлик қамоқ жазосига маҳкум этилди.
Изоҳ (0)