Йирик уран конлари, атом электр станциялари ҳамда ядро ёқилғисини бойитиш имконияти, шунингдек Собиқ Иттифоқ даврида баллистик ракеталар чиқарган корхоналарга эга бўлган Украина 10 йил ичида ядро бомбасини яратиши мумкин. Бу ҳақда россиялик мутахассисларга асосланиб, «Известия» нашри маълум қилди.
«Украина мудофаа вазири Валерий Гелетейнинг Украинага ядровий давлат мақомини қайтариш ва оммавий қирғин қуролини яратиш имконияти ҳақидаги баёноти — провокация, бироқ унга жиддий ёндашиш лозим, — дея Давлат думасининг мудофаа бўйича қўмитаси раиси ўринбосари Франц Клинцевич гапидан иқтибос келтирди нашр. — Шуни унутмаслик керакки, Украинада илм-фан доим ривожланган бўлган, бу нуқтаи назардан ядро бомбасини яратиш муаммо бўлмайди».
Клинцевич Украина ҳудудида бойитиш учун мўлжалланган бўлмаса-да, 17 та АЭС энергоблоклари борлигини эслатди.
«Агар улар энергоблоклардан бир-нечтасини бўшатиб, ушбу масалани ҳал этишга киришса, жараён узоқ вақтни олади. Бироқ улар 10 йилда бунга улгуради», — деди депутат.
«Известия»нинг таъкидлашича, Украинани ядровий давлатга айлантириш ядро қуролини тарқатмаслик тўғрисидаги барча халқаро меъёрларга зиддир, чунки ҳар қандай ядро қуроли товламачилик эмас, томонлар тенглиги воситасидир.
Шу билан бирга, ҳарбий эксперт Андрей Кленов Украинанинг Собиқ Иттифоқдан катта потенциални мерос қилиб олганини таъкидлади.
«Агар Украина президенти ядро қуроли яратиш ҳақида қарор қабул қилса, оддий портловчи моддалар ва радиоактив унсурлардан ташкил топган бомбани ясашга саноқли кунлар ҳам етарли бўлади», — дея ишонч билдирди Кленов.
14 сентябрь куни Украина мудофаа вазири Валерий Гелетей Ғарб Украинага ёрдам беришдан бош тортса, ядро қуролини ишлаб чиқишлари ҳақида айтган эди.
Изоҳ (0)