«МТС» ўрнига очилаётган янги операторга 2,5 миллион телефон рақами ажратилади

Таркибига «МТС» ОАЖ кириши кутилаётган Universal Mobile Systems (UMS) МЧЖнинг рақамлар ҳажми ўз фаолиятининг бошида 2,5 миллиондан иборат бўлади. Бу ҳақда «РИА Новости» маълумотига таяниб, Gazeta.uz хабар бермоқда.

Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси UMS’га илк фаолиятини олиб бориши учун 2,5 миллион абонент рақами ажратди. Улардан 1,5 миллиони Тошкент аҳолиси учун берилган бўлиб, қолган рақамлар Ўзбекистон вилоятлари бўйича тақсимланган.

Маълум қилинишича, Ўзбекистон томони «МТС» билан биргаликда қўшма корхона тузиш ва Ўзбекистон бозорида Россия компанияси фаолиятини тиклаш тўғрисидаги шартномада қайд этилган барча жараёнларни якунлаган. Хусусан, мазкур алоқа операторига 2G/3G/LTE лицензияси, частота, рақамлар сиғими тақдим этилиб, алоқа каналлари ижараси билан таъминланган.

Эслатиб ўтамиз, 16 сентябрь, сешанба куни Россия тергов қўмитаси расмий вакили Владимир Маркин «МТС»ни назорат қилувчи «Система» акциядорлик молиявий корпорацияси раҳбари Евтушенковнинг пул маблағларини «ювиш»да айбланганини маълум қилган.

Хабар берилганидек, Владимир Евтушенковнинг ҳибсга олиниши Ўзбекистонда Universal Mobile Systems қўшма корхонаси ташкил этилишига таъсир кўрсатмайди.