«Россельхознадзор» ходимлари Россия ҳудуди орқали Германиядан Ўзбекистонга 420 тонна, АҚШдан Қирғизистонга 375 тонна товуқ гўшти олиб ўтилишини тақиқлади. Kristall Export Import ва Merito Trading компаниялари ушбу маҳсулотларни қабул қилиб олувчи бўлган. Бу ҳақда Korrespondent.net хабар берди.
Маълум бўлишича, Германиядан юборилган юк кўздан кечирилганида қутиларнинг катта қисмида маркировка ёрлиғи йўқлиги аниқланган. Бошқа қутиларда эса ёрлиқлар шундай ёпиштирилганки, уларнинг бутунлигини бузмасдан туриб ўрамни очиш мумкин, дейилади хабарда. Баъзи контейнерлардаги юклар бетартиб жойлаштирилган, бу эса қутиларнинг йиртилиб кетишига сабаб бўлган.
АҚШдан йўл олган гўшт ветеринар сертификатида эса зарур маълумотларнинг кўпчилиги акс этмаган. Бундан ташқари, маҳсулот ишлаб чиқарилган сана сертификатдаги ахборот билан мос тушмаган.
Эслатиб ўтамиз, август ойида Россия АҚШ, Канада, Австралия, ЕИ давлатлари ва бошқа бир қатор мамлакатлардан озиқ-овқат маҳсулотлари импортини тақиқлади. Чекловлар рўйхатига товуқ гўшти ҳам киритилди.
Изоҳ (0)