7 сентябрь куни Ерга 20 метрли астероид яқинлашади

2014 RC рақамли астероид АҚШ шарқий соҳили вақти билан 7 сентябрь 14:18 да (Тошкент вақти билан 23:18 да) ерга яқинлашади. Диаметри 20 метрга тенг объект сайёрага минимал масофада яқин келади, дея хабар бермоқда NASA сайтида.

Астероид Янги Зеландия тепасидан учиб ўтади, бу Ер учун ҳеч қандай хавф солмайди. Яқинлашган пайтида у сайёрадан 40 минг километр баландликда бўлади.

Астроном олимлар 2014 RC’ни илк бора 2014 йил 31 августга ўтар кечаси Аризонадаги обсерваториядан аниқлашди. Сўнг, 1 сентябрга ўтар кечаси Гавайи оролларидаги Pan-STARRS мустақил телескопи ҳам объектни қайд этди.

Иккала обсерваториянинг кузатув натижалари Кембридж (Массачусетс)даги Кичик сайёралар марказига юборилди. Catalina Sky Survey лойиҳаси обсерваторияси ва Гавайи университетининг 2,2 метрли телескопи 2014 RC траекториясининг ўлчамларини тасдиқлади.

Бундан буён олимлар объектни кузатишда давом этмоқчи, чунки мутахассислар ҳисоб-китобларига кўра, у яна Ерга қайтиб келади.